ShQO-da «jalǵan qyzmetkerlerge» jalaqy tólegen dırektordyń jazasy kúsheıtildi
ÓSKEMEN. KAZINFORM — Shyǵys Qazaqstan oblysynda jumys istemeıtin adamdardy tirkep qoıyp, jalaqy tólep otyrǵan jol kompanııasy dırektorynyń jazasy qatańdatyldy.
«QAJservıs» JShS-nyń oblystyq fılıalynyń eks dırektory jumysqa ornalastyrǵan adamdar eńbek kelisimsharttarynda kórsetilgen mindettemelerdi is júzinde atqarmaǵan. Soǵan qaramastan olarǵa jalaqy eseptelip, jumys ýaqyty tabelderi men qarjylyq qujattar laýazymdy tulǵalar men olardyń týystarynyń ótinishteri boıynsha bekitilip otyrǵan.
— Sotqa deıingi tergeý barysynda fılıaldyń burynǵy dırektorynyń qylmysqa qatysy bar ekeni anyqtaldy. Qylmystyq is sotqa joldandy. Sot sheshimimen aıyptalýshyǵa 2 jyl 9 aı merzimge bas bostandyǵyn shekteý jazasy taǵaıyndaldy, — dep habarlady kompanııadan.
Alaıda prokýratýranyń apellıatsııalyq shaǵymynan keıin Shyǵys Qazaqstan oblystyq sotynyń qylmystyq ister jónindegi alqasy isti qarap, jaza merzimin 3 jyl 6 aıǵa bas bostandyǵyn shekteýge deıin uzartty. Budan bólek, sottalýshydan 6,7 mln teńge kóleminde keltirilgen materıaldyq zalal óndirildi.
Eske salsaq, osyǵan deıin Almatyda aqpan aıynda 600-den astam avtokólik ekologııalyq normany buzǵany habarlanǵan.
