ShQO-da jalǵan kásipkerler bıýdjetten 6,3 mlrd. teńge jymqyrdy
ÓSKEMEN. QazAqparat - Shyǵys Qazaqstan oblysynyń aýmaǵynda tarmaqtalǵan jalǵan kásipkerlikter jelisin qurǵan birneshe uıymdasqan qylmystyq toptyń qyzmetine tosqaýyl qoıyldy.
ShQO boıynsha memlekettik kirister departamenti ekonomıkalyq tergeý qyzmeti toǵyz aıdyń ishinde sotqa deıingi 101 óndiristi tirkep, 59 isti sotqa jóneltti. Anyqtalǵan zalal kólemi 6,3 mlrd. teńgeni qurady, al memlekettik qazynaǵa qaıtarylǵan soma - nebári 223,4 mln. teńge.
ShQO boıynsha memlekettik kirister departamenti ekonomıkalyq tergeý qyzmetiniń aǵa tergeýshi Láılá Iskakova «QazAqparat» HAA tilshisine bergen suhbatynda búgingi kúni ekonomıkalyq qylmys eldiń ilgeri damýyna jáne onyń ekonomıkalyq negizin nyǵaıtýǵa shynaıy qaýip tóndire bastaǵanyn aıtty. Onyń eń ózekti jáne keń taralǵan túrleriniń biri jalǵan kásipkerlikterdi qurý jolymen bıýdjetke salyqty jáne ózge de mindetti tólemderdi tóleýden jaltarý bolyp tabylady.
Aǵa tergeýshi sondaı-aq, Ekonomıkalyq tergeý qyzmeti erekshe nazardy qylmystyq jolmen tabylǵan aqsha qarajattarynyń zańdastyrylýyna jáne olardyń zańsyz qolma-qol aqshaǵa aınaldyrylýyna jol bermeýge bóletindigin atap ótti. Jyl basynan beri ekinshi deńgeıli bankterde qarjy qarajattaryn qolma-qol aqshaǵa aınaldyrý kezinde 5 jalǵan kásipkerliktiń ókilderi ustaldy. Qolma-qol aqshaǵa aınaldyrylǵan soma kólemi 34,9 mln. teńgeni qurady.
Onymen qosa, 3 qylmystyq is boıynsha 67 mln. teńge somasyna ekinshi deńgeıli bankterde ashylǵan shottarǵa shekteýler qoıyldy. Qazir barlyq qylmystyq ister boıynsha tergeý júrýde.
