ShQO-da jaǵdaıy nasharlap ketken náreste aýrýhanaǵa tikushaqpen jetkizildi

ÓSKEMEN. QazAqparat – Shyǵys Qazaqstan oblysy Tarbaǵataı aýdanynda jaǵdaıy aýyrlap ketken náreste Óskemendegi aýrýhanaǵa tikushaqpen jetkizildi, dep habarlaıdy QazAqparat tilshisi.

QR TJM «Qazavıa qutqarý» AQ jedel-dıspetcherlik qyzmetine Tarbaǵataı aýdany Aqjar aýylynda jańa týǵan náresteniń jaǵdaıy nasharlap ketkeni, ony shuǵyl túrde Óskemendegi aýrýhanaǵa jetkizý qajettigi týraly habar túsken.

Óskemen qalasynda ornalasqan Mı-8 tikushaǵy birden sol jaqqa qaraı ushyp ketti. Bortta áýe kemesiniń komandıri Rýslan Aǵlambekov, ekinshi ushqysh Májıt Kenjeǵalıev, avıatsııa qyzmetkerleri Áýelbek Qazaqpaev, Perdebek Jumabaev, Sáken Bekjanov, Ulttyq shuǵyl medıtsınany úılestirý ortalyǵynyń dárigerleri, oblystyń bas neonatology Ashat Qýanyshpaev pen feldsher Bek Asaýbaev bolǵan.

«Náreste jedel túrde Aqjar aýylynan Óskemenge jetkizildi. Qazirgi ýaqytta ol Ana men bala ortalyǵynda dárigerlerdiń baqylaýynda», - dedi «Qazavıa qutqarý» AQ baspasóz hatshysy Almaz Ǵabdýllın.