ShQO-da jaǵaǵa jete almaı qalǵan 4 balyqshy qutqaryldy
ÓSKEMEN. KAZINFORM – Shyǵys Qazaqstan oblysynda jaǵaǵa jete almaı qalǵan 4 balyqshyǵa qutqarýshylar kómekke keldi.
ShQO Tótenshe jaǵdaılar departamenti baspasóz qyzmetiniń málimetine súıensek, 4 er adam Buqtyrma sý qoımasynyń Qarakól shyǵanaǵyna balyq aýlaýǵa ketken. Alaıda olar jaǵalaýdan tym alystap ketip, qutqarýshylardan kómek suraýǵa májbúr boldy.
«Belgili bolǵandaı qaıyq qozǵaltqyshynyń aqaýyna baılanysty olar jaǵaǵa jete almaı qalǵan. Habar túse salysymen qutqarýshylar kómekke keldi. TJD qyzmetkerleri balyqshylardy jaǵaǵa aman-esen jetkizdi. Er adamdarǵa medıtsınalyq kómek qajet bolǵan joq», - dep habarlady vedomstvo ókilderi.
Osy rette, qutqarýshylar óńir jurtshylyǵyna qaıyqta qutqarý kúrteshesin kııýdi, qatty jel kezinde sýǵa shyqpaýdy jáne sapar aldynda júzý quralynyń jaramdylyǵyn tekserý qajettigin eskertti.
