ShQO-da jabyq jolǵa shyqqan júrgizýshige 72 myń teńge aıyppul salyndy
ShQO Polıtsııa departamenti baspasóz qyzmetiniń málimetine súıensek, bıylǵy qysta qar qalyń jaýyp, qatty boran soǵýyna baılanysty joldar jıi jabylýda. Tipti keıbir kúnderi óńirdegi barlyq jolda kólik qozǵalysy shektelgen edi.
Osyndaı kezde polıtseıler joldardyń apattyq ýchaskelerinde kúsheıtilgen rejımde jumys istep, jolda qalǵan júrgizýshilerge kómektesedi. Sondaı-aq buqaralyq aqparat quraldarynda jáne áleýmettik jelilerde turǵyndarǵa ózderiniń jáne jaqyndarynyń ómirin qaterge tikpes úshin qolaısyz aýa raıynda jolǵa shyqpaýdy eskertip otyrdy. Alaıda bul eskertýdi tyńdamaıtyndar da bolady.
Máselen, Zaısan aýdanynyń 39 jastaǵy turǵyny polıtsııa qyzmetkeriniń zańdy talabyna baǵynbaı, «Toyota Avalon» avtokóligimen jabyq turǵan respýblıkalyq mańyzy bar «Omby-Maıqapshaǵaı» tasjolyna shyqqan.
Sol úshin júrgizýshi Zaısan aýdandyq sotynyń sheshimimen QR ÁQBtK-niń 667-baby 1-bóligimen kináli dep tanyldy. Oǵan 21 AEK, ıaǵnı 72450 teńge mólsherinde aıyppul salyndy.