ShQO-da zeınetkerlerge medıtsınalyq kómek bólek kórsetile bastady
ÓSKEMEN. QazAqparat - Shyǵys Qazaqstannyń aýrýhanalarynda zeınet jasynan asqan turǵyndarǵa medıtsınalyq kómek kórsetetin bólimsheler ashylyp jatyr, dep habarlaıdy QazAqparat tilshisi.
Oblystyq densaýlyq saqtaý basqarmasy basshysynyń orynbasary Іlııas Muhamedjannyń aıtýynsha, ázirge mundaı bólimsheler Semeı men Óskemen qalalarynda ashylǵan. Atalmysh bólimsheler bir jolda 60 zeınetkerge qyzmet kórsete alady. «Densaýlyq» baǵdarlamasynyń aıasynda qolǵa alynǵan bul joba aýdandarda iske asyryla bastaǵan. Ázirge aýdandar boıynsha 102 arnaıy kabınet zeınetkerler úshin jabdyqtalǵan.
Óskemendegi bólimsheniń biri M.Áýezov dańǵylynda ornalasqan №1 emhanada ashylsa, ekinshisi «Vıta-1» emhanalar jelisinde jumys bastap ketti.
«Ázirge biz elektrondyq kezek sııaqty zamanaýı tásilderdi paıdalanýǵa múmkindigi joq, jasy jetken zeınetkerlerdi qabyldap jatyrmyz. Ásirese zeıini nasharlaǵan qarttar kóptep kelýde. Bizdiń emhanaǵa tirkelgen 1 200 zeınetkerdiń bári derlik jasy 70-ten asqandar. Bólimshe ǵımarattyń birinshi qabatynda ornalasqan. Munda zeınetkerler densaýlyǵyna saı tegin dáriler alyp qana qoımaı, kezek kútip otyrǵan ýaqytta jıhazben jabdyqtalǵan bólmede teledıdar kóre alady. Olardyń kútimine jaýapty pısholog pen medbıke aldyq. Ázirge tirkeýsiz-aq qabyldap jatyrmyz. Keıin ony da bir júıege keltirý kerek», - deıdi emhana dırektory Raıa Raqymova.
