ShQO-da zeınetkerdiń 18 mln teńgesin urlap ketti
ÓSKEMEN. QazAqparat – Shyǵys Qazaqstan oblysynda zeınetkerdiń 18 mln teńgesin urlap ketti, dep habarlaıdy QazAqparat tilshisi.
Rıdder qalasynyń polıtsııa bólimine 65 jastaǵy qarııa aryzdandy. Zeınetker úıge belgisiz bireýdiń kirip, jatyn bólmedegi shkafta turǵan aqshasyn urlap ketkenin jetkizgen. Jedel áreket etken ShQO PD Krımınaldyq polıtsııa basqarmasynyń qyzmetkerleri birneshe kún ishinde kúdiktini qolǵa túsirdi.
«Anyqtalǵandaı, úı ishinde eshkimniń joq ekenine kóz jetkizgen ury tereze arqyly kirgen. Jatyn bólmedegi shkaftan shetel valıýtasyndaǵy 18 mln teńgeden astam aqsha salynǵan paketti alyp, oqıǵa ornyna izin sýytady. Rıdder qalasynyń 41 jastaǵy turǵyny óz kinásin moıyndap otyr», - dedi departament bastyǵynyń orynbasary Talǵat Shaıahmetov.
Er adam aqshanyń biraz bóligin tyǵyp qoıǵanyn, qalǵanyn ózimen birge Óskemenge alyp ketkenin aıtty. Tártip saqshylary onyń úıin tintý barysynda aqshany tapty. Kúdikti urlanǵan qarajattyń birazyna qymbat smartfondar, kıim-keshek pen altyn buıymdar satyp alǵan. Qalǵan soma jábirlenýshige qaıtarylyp berildi.
Qazirgi ýaqytta polıtseıler QR Qylmystyq kodeksiniń 188-baby 4-bóligi boıynsha sotqa deıingi tergeý amaldaryn bastady.
