ShQO-da zeınetkerdi soqqyǵa jyqqan eki adam ustaldy
ÓSKEMEN. QazAqparat – Shyǵys Qazaqstan oblysy Rıdder qalasynda zeınetkerdi soqqyǵa jyqqan eki er adam ustaldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetinshe, keshe «102» jedel arnasyna Rıdder qalalyq aýrýhana medbıkesinen 70 jastaǵy zeınetkerdiń dene jaraqattarymen travmatologııa bólimine júgingeni týraly habar túsken.
Oqıǵa ornyna tez arada jedel-tergeý toby jiberildi. Jábirlenýshiniń aıtýyna qaraǵanda,14 qańtar kúni shamamen keshki saǵat 22:00-de úıine betperde kıgen belgisiz eki er adam basa-kóktep kirgen. Qartty uryp-soqqan olar 7000 teńgeni alyp, sol jerden iz sýytqan.
«Jedel izdestirý sharalary barysynda krımınaldyq polıtsııa bóliminiń qyzmetkerleri 33 jáne 44 jastaǵy kúdiktilerdi ustady. Ekeýi de óz kinálaryn moıyndap otyr», - dedi ShQO PD bastyǵy Saǵat Madıev.
Qazirgi ýaqytta kúdiktiler ýaqytsha ustaý ızolıatoryna qamaýǵa alyndy. QR QK-niń 192-baby 3-bóligi (Qaraqshylyq) boıynsha sotqa deıingi tergeý amaldary bastaldy.
