ShQO-da zeınetker 800 myń teńgesinen aıyrylyp qaldy
ÓSKEMEN. QazAqparat – Shyǵys Qazaqstan oblysynda zeınetkerdiń aqshasyn kórshisi urlap ketken, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, Borodýlıha aýdandyq polıtsııa bólimine kelgen 73 jastaǵy zeınetker aqshasy urlanǵanyn aıtyp, aryz túsirgen. Keltirilgen shyǵyn mólsheri 800 myń teńgeni qurady.
«Tártip saqshylary jedel-izdestirý sharalary barysynda kúdiktini qolǵa túsirdi. Bul - jábirlenýshiniń 37 jastaǵy jumyssyz kórshisi bolyp shyqty. Ol qylmysyn moıyndap otyr», - dedi ShQO PD bastyǵy Saǵat Mádıev.
Polıtseıler zeınetkerge aqshanyń bir bóligin ǵana qaıtaryp bere alǵan. Sebebi kúdikti qarajattyń birazyn jeke qajettilikterine jumsap úlgergen.
Qazirgi ýaqytta 37 jastaǵy er adamǵa qatysty QR Qylmystyq kodeksiniń 188-baby 3-bóligi 3-tarmaǵy boıynsha sotqa deıingi tergeý amaldary júrgizilýde.
