ShQO-da zańsyz saqtalǵan 50-den astam qarý tárkilendi
ShQO Polıtsııa departamenti baspasóz qyzmetiniń málimetine súıensek, tártip saqshylary óńir aýmaǵynda 3 aqpannan bastap «Qarý» jedel-aldyn alý sharasyn ótkizýde.
Sonyń aıasynda turǵylyqty jeri boıynsha qarý ıeleri tekserilip, 193 zańbuzýshylyq anyqtaldy. Atap aıtqanda, qarýdy satyp alý, saqtaý, paıdalaný jáne tasymaldaý erejelerin buzǵany úshin 96 adamǵa, qarýdy tirkeý nemese qaıta tirkeý talaptaryn saqtamaǵan úshin 49 adamǵa aıyppul salyndy.
«Budan bólek, QR ÁQBtK-niń 482 babyna sáıkes (qarýdy zańsyz ıelený, berý, ótkizý) 48 adam jaýapkershilikke tartylyp, 21 adamǵa qatysty qylmystyq is qozǵaldy. Zańsyz aınalymnan 54 qarý men 230 oq tárkilendi. Onyń ishinde 9 ıir oıyqty, 25 tegis uńǵyly myltyq pen 1 granata bar», - delingen aqparatta.
Osy rette, departament mamandary QR Qylmystyq Kodeksiniń 287-babyna sáıkes zańsyz saqtalǵan atys qarýyn, oq-dárini nemese jarylǵysh zattardy óz erkimen tapsyrǵan azamattar ákimshilik jáne qylmystyq jaýapkershilikten bosatylatyndyǵyn eske saldy.