ShQO-da zańsyz saqtalǵan 30-dan astam qarý tárkilendi
ÓSKEMEN. QazAqparat – Shyǵys Qazaqstan oblysynyń polıtsııa qyzmetkerleri zańsyz saqtalǵan 30-dan astam qarýdy tárkiledi, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, tártip saqshylary «Quqyqtyq tártip» jedel aldyn alý sharasy aıasynda zańsyz aınalymdaǵy atys qarýlaryn tárkilep jatyr.
«Óńirde shara bastalǵaly beri 30-dan astam túrli qarý tárkilendi. Atap aıtqanda, 4 sholaq myltyq, 7 oıyq vıntovka, 2 tapansha, onyń ishinde qoldan jasalǵan revolver, 22 tegis uńǵyly myltyq, RGD-5 áskerı granatasy bar. Bul qarý-jaraq arsenaldary kez-kelgen ýaqytta zańsyz áreketter jasaý kezinde paıdalanylýy múmkin edi», - dedi oblystyq PD bastyǵynyń orynbasary Talǵat Shaıahmetov.
Onyń aıtýynsha, tegis uńǵyly qarýdy saqtaǵan adamdar QR ÁQBtK-niń 482-baby boıynsha ákimshilik jaýapkershilikke tartylǵan. Travmatıkalyq jáne oıyq qarýdy zańsyz ustaǵan azamattarǵa qatysty QR QK-niń 287-babyna sáıkes sotqa deıingi tergeý amaldary júrgizilýde.
