ShQO-da zańsyz balyq aýlaýdyń 160-qa jýyq deregi anyqtaldy
ÓSKEMEN. QazAqparat – Shyǵys Qazaqstan oblysynda «Ýyldyryq» jedel aldyn alý sharasynyń 14 kúninde zańsyz balyq aýlaýdyń 160-qa jýyq faktisi tirkeldi, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, «Ýyldyryq» jedel aldyn alý sharasynyń maqsaty – sý obektilerin qorǵaý, balyq aýlaýdaǵy zańbuzýshylyqtardy anyqtaý, aldyn alý jáne jolyn kesý, ekologııalyq qylmystardy ashý.
«Shara bastalǵaly beri balyq resýrstaryn zańsyz aýlaýdyń 160 faktisi anyqtalǵan. Nátıjesinde, 154 adamǵa jalpy somasy 2 mln teńgeden astam aıyppul salyndy. Onyń ishinde 1 200 000 teńge óndirip alyndy», - dedi ShQO PD bastyǵy Saǵat Mádıev.
Sondaı-aq tártip saqshylary 1 tonnadan astam balyq pen sıntetıkalyq monofılamentten jasalǵan 3000 metr tordy tárkiledi. Memleketke keltirilgen zalal mólsheri – 1,5 mln teńgeni qurap otyr.
Aıta keteıik, balyq aýlaýdyń normalary men erejelerin buzǵan adam QR ÁQBtK-niń 383-babyna jáne QR QK-niń 335-babyna sáıkes jaýapqa tartylady.
