ShQO-da zańsyz balyq aýlaǵan 64 adamǵa aıyppul salyndy
ÓSKEMEN. QazAqparat – Shyǵys Qazaqstan oblysynda «Ýyldyryq» jedel aldyn alý sharasynyń alǵashqy 4 kúninde zańsyz balyq aýlaýdyń 70-ke jýyq deregi anyqtaldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, óńirde 16 sáýir men 30 mamyr aralyǵynda sý obektilerin qorǵaý, balyq aýlaýdaǵy zańbuzýshylyqtardy anyqtaý, aldyn alýǵa jáne jolyn kesýge, ekologııalyq qylmystardy ashýǵa baǵyttalǵan «Ýyldyryq» jedel aldyn alý sharasy ótkizilýde.
«Tórt kún ishinde balyq resýrstaryn zańsyz aýlaýdyń 70-ke jýyq deregi anyqtaldy. 64 adamǵa qatysty jalpy somasy 1 mln teńgeden astam aıyppul salyndy. Polıtseıler MI-8 tikushaǵymen birqatar aýmaqqa áýeden barlaý júrgizgen. Sondaı-aq Ulan, Kúrshim, Tarbaǵataı jáne Kókpekti aýdandarynyń ańshylyq alqaptary tekserildi», - dedi ShQO PD bastyǵy Saǵat Mádıev.
Áýeden sholý barysynda jaǵalaýlardyń birinen 18 qaıyq tabyldy. «Rahmetolla» ýchaskesinde qyzmetkerler 2 rezeńke qaıyq, eskek, qaıyq motory men qapshyqtaǵy aýlardy anyqtady. Barlyq zattaı dáleldemeler aımaqtyq balyq ınspektsııasyna joldanǵan.
Aıta keteıik, balyq aýlaýdyń zańmen belgilengen normalary men qaǵıdalaryn buzǵany úshin QR ÁQBtK-niń 381-babyna jáne QR QK-niń 335-babyna sáıkes jaýapkershilik qarastyrylǵan.
