ShQO-da zańsyz aǵash kesken azamat ustaldy
SEMEI. QazAqparat - Shyǵys Qazaqstan oblysynyń Borodýlıha aýdanynda tabıǵat qaskóıi erekshe qorǵalatyn tabıǵı aýmaqtan qaraǵaı aǵashtaryn kesip, memleketke materıaldyq zalal keltirgen. Aýdandyq sot zańsyz aǵash kesken azamatqa qatysty sot úkimin shyǵardy. Bul týraly QazAqparat Borodýlıha aýdandyq sotynyń baspasóz qyzmetine silteme jasap habarlaıdy.
Qylmystyq istiń materıalyna sáıkes aýdan turǵyny ruqsat qujattarynsyz erekshe qorǵalatyn Dmıtrıevka ormanshylyǵynyń tabıǵı aýmaǵyna kirip, 8 qaraǵaıdy zańsyz kesken. Osylaısha ol «Semeı ormany» mekemesine 20 285 teńge somasyna materıaldyq zalal keltirgen.
Azamatty tártip saqshylary qaraǵaılardy otap jatqan ýaqytta qolǵa túsirgen. Onyń ústinen erekshe qorǵalatyn tabıǵı aýmaqta zańsyz aǵash kesý baby boıynsha qylmystyq is qozǵaldy.
Sot úkimimen QR QK-niń 340-baby, 3-bóligi, 4-tarmaǵynda (Erekshe qorǵalatyn tabıǵı aýmaqtarda orman qoryna kirmeıtin jáne tyıym salynǵan aǵashty kesý, zańsyz kesý, joıý nemese zaqymdaý) kórsetilgen quqyq buzýshylyq jasaǵany úshin kináli dep tanylyp, oǵan 100 saǵat merzimge qoǵamdyq jumystarǵa tartý túrindegi jaza taǵaıyndaldy.
Sondaı-aq «Semeı ormany» mekemesiniń basshylyǵyna qyzmettik mindetterin adal oryndaýyna basa nazar aýdarý týraly jeke qaýly shyǵaryldy.
