ShQO-da zańsyz jumys istep júrgen 12 Qytaı azamaty elden shyǵaryldy
ÓSKEMEN. KAZINFORM – Shyǵys Qazaqstan oblysy Kúrshim aýdanynda zańsyz jumys istep júrgen 12 Qytaı azamaty anyqtaldy. Sot sheshimimen olar elden shyǵaryldy.
ShQO soty baspasóz qyzmetiniń málimetine súıensek, Kúrshim aýdandyq sotynda QHR azamattaryna qatysty QR ÁQBtK-niń 517-baby 5-bóligimen ákimshilik is qaraldy.
Belgili bolǵandaı, olar jumysqa turǵanda tıisti ruqsat qaǵazdaryn almaı, kóshi-qon salasyndaǵy zańnama talaptaryn buzǵan. Sot barysynda olar óz kinálaryn tolyqtaı moıyndady.
«Sot sheshimimen 12 Qytaı azamaty kináli dep tanylyp, Qazaqstan Respýblıkasy aýmaǵynan shyǵarylyp jiberildi. Qaýly tolyqtaı zańdy kúshine endi», - delingen aqparatta.
Eske salsaq, osyǵan deıin Óskemende júrgizýshi kýáligine emtıhan tapsyrǵandardan 40 mln teńge syıaqy alǵan HQO qyzmetkerleri sottalǵany habarlanǵan.
