ShQO-da zańsyz qurylysqa qatysty 260-tan astam is qozǵaldy
ÓSKEMEN. KAZINFORM — Shyǵys Qazaqstan oblysynda bıyl 119 qurylys lıtsenzııasynyń qoldanysy toqtatyldy.
Bul týraly ShQO Óńirlik kommýnıkatsııalar qyzmetinde ótken brıfıngte oblystyq memlekettik sáýlet-qurylys baqylaý basqarmasy basshysynyń orynbasary Samat Kaırdınov málim etti.
— Óńirde zańsyz qurylysqa qarsy baqylaý kúsheıtildi. Jyl basynan beri júrgizilgen jospardan tys tekserýlerdiń nátıjesinde 261 ákimshilik is qozǵaldy. Onyń ishinde 244 is tapsyrys berýshilerge, 7 is tehnıkalyq qadaǵalaý sarapshylaryna, 7 is tehnıkalyq zerttep-qaraý júrgizgen uıymǵa, 3 is merdiger mekemelerge qatysty. Tekseris nátıjesine sáıkes, 119 memlekettik qurylys lıtsenzııasynyń qoldanysy 6 aıǵa shektelip, 2 lıtsenzıattyń qyzmeti toqtatyldy, — dedi ol.
Budan bólek, 89 lıtsenzıatqa ákimshilik quqyq buzýshylyq týraly hattama rásimdeldi. Anyqtalǵan zańbuzýshylyqtardy joıý jóninde 58 nusqama berildi.
Eske salsaq, osyǵan deıin Pavlodarda merdigerlerdiń 20 qurylys lıtsenzııasy toqtatylǵany habarlanǵan.
