ShQO-da zańsyz eńbek etken 18 sheteldik azamat anyqtaldy
ALMATY. KAZINFORM – ShQO polıtsııasy kóshi-qon zańyn buzǵan sheteldikterge shara qoldandy.
Polisia.kz-tiń málimetinshe, «Quqyqtyq tártip» jedel-profılaktıkalyq is-sharasy aıasynda kóshi-qon qyzmeti qyzmetkerleri ýaqytsha jáne turaqty turatyn sheteldik azamattardyń tirkeý mekenjaılary men qabyldaýshy tulǵalardyń olardyń kelýi týraly habarlamalarynyń bar-joǵyn tekserip jatyr.
Óskemen qalasynda júrgizilgen reıd barysynda bir kún ishinde Qazaqstan Respýblıkasynyń aýmaǵynda zańsyz eńbek etken 18 sheteldik anyqtaldy.
10 naýryzda mekenjaılardyń birinde tekserý kezinde polıtsııa qyzmetkerleri ýákiletti organnyń ruqsatynsyz jumys istegen jáne ýaqytsha turýǵa ruqsaty joq kórshiles memleket azamattaryn anyqtady. Olardyń keıbiri buǵan deıin de osyndaı quqyq buzýshylyqtary úshin jaýapqa tartylǵany belgili boldy.
– Kóshi-qon zańnamasyn qaıtalap buzǵany úshin 7 sheteldik azamat Qazaqstan Respýblıkasynyń aýmaǵynan shyǵaryldy. Qoldanystaǵy zańnamaǵa sáıkes, olarǵa el aýmaǵyna bes jyl merzimge kirýge tyıym salyndy. Sonymen qatar jumys berýshi de jaýapkershilikke tartylyp, memleket paıdasyna 100 aılyq eseptik kórsetkish kóleminde aıyppul tóleýge mindetteledi, - deıdi ShQO PD kóshi-qon qyzmeti basqarmasynyń bastyǵy Rınat Shkıbaev.
ShQO polıtsııa departamentiniń kóshi-qon qyzmeti Qazaqstan Respýblıkasynyń aýmaǵynda ýaqytsha turatyn sheteldik azamattarǵa ýákiletti organnyń ruqsatynsyz eńbek etýge tyıym salynatynyn eske salady.
Buǵan deıin Qaraǵandy oblysynda kóshi-qon zańnamasyn buzǵan azamattar anyqtalǵanyn jazǵan edik.
