Shyǵys Qazaqstanda Qytaı azamattary zańsyz altyn óndirisine tartylǵan
ASTANA. KAZINFORM — Qarjylyq monıtorıng agenttigi Shyǵys Qazaqstan oblysy boıynsha departamenti Ulttyq qaýipsizdik komıteti departamentimen jáne prokýratýramen birlesip, Marqakól aýdanyndaǵy Aqbulaq aýylynyń mańynda tıisti ruqsat qujattarynsyz altyn óndirgen adamdar tobynyń zańsyz qyzmetin toqtatty.
Qarjylyq monıtornıng agenttiginiń habarlaýynsha, quramynda altyny bar kendi zańsyz óndirý jáne óńdeý saldarynan qorshaǵan ortaǵa eleýli zalal keltirildi.
— Atap aıtqanda, topyraqtyń qunarly qabaty búlinip, jer bederiniń tabıǵı qurylymy buzylyp, ózen arnasy ózgertilgen. Zańsyz jumystar jalpy aýmaǵy 30 gektar jer ýchaskesinde aýyr arnaıy tehnıka men óndiristik keshenderdi paıdalaný arqyly júrgizilgen, — delingen habarlamada.
Zańsyz qyzmetke 30-dan astam adam, onyń ishinde Qytaı Halyq Respýblıkasynyń azamattary tartylǵan.
Tintý barysynda alty 40 tonnalyq júk kóligi, tórt shynjyr tabandy ekskavator, bir tıegish, sondaı-aq quramynda altyny bar kendi óndirýge jáne jýýǵa arnalǵan eki óndiristik keshen tárkilendi.
Tergeý jalǵasyp jatyr. Qazaqstan Respýblıkasy Qylmystyq-protsestik kodeksiniń 201-babyna sáıkes ózge aqparat jarııa etilmeıdi.
Eske salaıyq, buǵan deıin Aqmola oblysynda altyn óńdeıtin jasyryn tseh anyqtalǵanyn habarlaǵan edik.
