ShQO-da zańsyz altyn óndirgen toptan 40 myń dollar men altyn tárkilendi
ASTANA. KAZINFORM — Shyǵys Qazaqstan oblysynda polıtsııa quramynda altyny bar shıkizatty zańsyz óndirýmen aınalysqan qylmystyq toptyń áreketin toqtatty. Arnaıy operatsııa barysynda 76 adam ustalyp, altyn, iri kólemdegi qarjy, arnaıy tehnıka men zańsyz qyzmetke qatysty qujattar tárkilendi. Bul týraly Polisia.kz jazdy.
Іshki ister mınıstrligi baǵaly metaldardyń zańsyz aınalymyna qarsy is-qımyldy, olardy zańsyz óndirý faktileriniń jolyn kesýge, sondaı-aq jer qoınaýyn paıdalaný salasyndaǵy qylmystyq shemalardy anyqtaýǵa baǵyttalǵan is-sharalar keshenin turaqty negizde júzege asyryp keledi.
Júrgizilip jatqan jumystar aıasynda Shyǵys Qazaqstan oblysynyń aýmaǵynda polıtsııa qyzmetkerleri jaýapkershiligi shekteýli seriktestikterdiń biriniń zańdy qyzmetin búrkemeleı otyryp, quramynda altyny bar shıkizatty zańsyz óndirý men óńdeýdi uıymdastyrǵan adamdar tobynyń zańsyz áreketiniń jolyn kesti. Jedel is-sharalardy júrgizý barysynda quqyqqa qaıshy shemany uıymdastyrýshylar men basshylaryn qosa alǵanda 63 adam, sondaı-aq óńir aýmaǵynda zańsyz qyzmetpen aınalysqan shet memlekettiń 13 azamaty ustaldy.
— Júrgizilgen tintý sharalarynyń nátıjesinde birneshe avtokólik pen arnaıy tehnıka, iri kólemdegi qarajat, onyń ishinde 40 myń AQSh dollarynan astam qarjy, quramynda altyny bar shıkizat pen altyn, sondaı-aq zańsyz qyzmetti rastaıtyn qujattar men ózge de zattaı dáleldemeler tárkilendi. Aldyn ala málimetterge sáıkes, paıdaly qazbalardy zańsyz óndirý nátıjesinde qorshaǵan ortaǵa eleýli zalal keltirilgen. Zańsyz qyzmet topyraq jamylǵysynyń buzylýyna, tabıǵı landshafttyń ózgerýine, jerdiń búlinýine jáne óńirdiń ekojúıesine ózge de teris áserlerdiń týyndaýyna ákep soqqan. Keltirilgen ekologııalyq zalaldyń mólsheri taǵaıyndalǵan saraptamalar sheńberinde anyqtalýda. Baǵaly metaldardyń zańsyz aınalymy faktisi, sondaı-aq qylmystyq zańnamanyń ózge de baptary, onyń ishinde qorshaǵan ortaǵa zııan keltirýge baılanysty quqyq buzýshylyqtar boıynsha sotqa deıingi tergep-tekserý júrgizilip jatyr. Olardyń túpkilikti quqyqtyq saralanýy tergep-tekserý nátıjeleri boıynsha beriletin bolady. Qazirgi ýaqytta jasalǵan qylmystyń barlyq mán-jaılaryn anyqtaýǵa, zańsyz shemanyń ózge de qatysýshylaryn áshkereleýge, sondaı-aq quqyq buzýshylyqqa qatysy bar barlyq adamdardy zańda belgilengen jaýaptylyqqa tartýǵa baǵyttalǵan tergeý jáne jedel is-sharalar kesheni júrgizilýde, — dedi ІІM uıymdasqan qylmysqa qarsy kúres departamentiniń ókili Qýandyq Alpys.
Aıta keteıik, byltyr altyn urlyǵy men zańsyz ken óndirýge qatysy bar 1400-den astam adam ustaldy.
