ShQO-da zańbuzýshylyq týraly prokýratýraǵa habarlamaǵan basshy sottaldy

ÓSKEMEN. KAZINFORM — Shyǵys Qazaqstan oblysynda zańbuzýshylyq týraly prokýratýraǵa habarlamaǵan departament bastyǵyna 5,5 mln teńge aıyppul salyndy.

Qalalyq № 2 soty baspasóz qyzmetiniń málimetine súıensek, QR TJM Ónerkásiptik qaýipsizdik komıteti Shyǵys Qazaqstan oblysy boıynsha departamentiniń bastyǵyna qatysty qyzmet babyn asyra paıdalanǵany úshin qylmystyq is qaraldy. 

— Belgili bolǵandaı, departament mamandary 2024 jyldyń naýryz aıynda shahtalardy jospardan tys tekserý nátıjesinde eńbek qaýipsizdigi talaptaryn buzý faktilerin anyqtaǵan. Osylaısha, sol shahtaǵa jumysshylardyń túsýine tyıym salynýy tıis bolǵan. Alaıda aıyptalýshy óz qyzmetkerlerine bul týraly prokýratýraǵa habarlamaý týraly tapsyrma berdi. Demek, departament bastyǵy jumysshylardyń qaýipsiz eńbek jaǵdaılaryna qatysty konstıtýtsııalyq quqyqtaryn buzyp, JShS qyzmetin toqtata turý týraly sotqa talap aryzben júginbegen, — delingen aqparatta.

Sot barysynda sottalýshy óz kinásin tolyq moıyndady. Sot sheshimimen oǵan 1500 AEK (5 538 000) teńge aıyppul salynyp, memlekettik qyzmette jumys isteýge ómir boıyna tyıym salyndy. Úkim áli zańdy kúshine engen joq. 

Eske salsaq, osyǵan deıin Almatyda mas kúıinde jasóspirimdi qaǵyp, oqıǵa ornynan qashyp ketken júrgizýshi sottalǵany habarlanǵan.