ShQO-da ıadrolyq polıgonnyń jabylýyna 30 jyl tolýyna oraı halyqaralyq konferentsııa ótedi
2021 jyldyń tamyzynda Elbasy Nursultan Nazarbaevtyń «Semeı ıadrolyq synaq polıgonyn jabý týraly» Jarlyǵyna qol qoıǵanyna 30 jyl tolady. Bul ıadrosyz, beıbit ómirdi tańdaǵan Qazaqstan tarıhyndaǵy mańyzdy oqıǵa boldy. Polıgonda barlyǵy 456 ıadrolyq jarylys jasalǵan. Olardyń jalpy qýaty Hırosımaǵa tastalǵan atom bombasynan 2,5 myń ese asyp tústi.
Oblystyq Aqparat ortalyǵynda ótken baspasóz brıfıngi barysynda ShQO ákiminiń orynbasary Azamat Mýhamedchınov Semeıde ataýly kúnge oraı Tuńǵysh Prezıdent kitaphanasynyń «Іrgeli sheshimder ýaqyty» atty kórmesi usynylatynyn aıtty.
«Sondaı-aq Semeıde, Beıbitshilik aralynda «Ólimnen de kúshti« monýmentine gúl shoqtaryn qoıýmen dástúrli halyqaralyq «Beıbitshilik« aktsııasy ótedi. «Ekologııa. Radıatsııa. Densaýlyq« atty halyqaralyq konferentsııa uıymdastyrý josparlanýda. Kýrchatov qalasynda da birqatar is-sharalar ótkizilmek. Máselen, Ulttyq ıadrolyq ortalyq pen AQSh ǵalymdarynyń qatysýymen Semeı synaq polıgonynyń tarıhyna arnalǵan stela ashý josparlanýda», - dedi ol.
7-9 qyrkúıekte Ulttyq ıadrolyq ortalyqta «Semeı ıadrolyq polıgony: ǵylymı-tehnıkalyq áleýet murasy jáne damý keleshegi» atty halyqaralyq konferentsııa ótedi. Qazirgi ýaqytta 19 jaqyn jáne alys shetel ókilderi konferentsııaǵa qatysatyndyǵy týraly málimdegen.
