ShQO-da velosıped urlyǵyna múlik ıeleriniń salǵyrttyǵy sebep bolyp otyr
ÓSKEMEN. KAZINFORM — Shyǵys Qazaqstan oblysynda jyl basynan beri urlanǵan 30-ǵa jýyq velosıped ıelerine qaıtaryldy.
ShQO polıtsııa departamenti baspasóz qyzmetiniń málimetine súıensek, óńir boıynsha bıyl velosıped urlaýdyń 38 deregi tirkeldi. Tártip saqshylary olardyń 27-sin ıelerine qaıtaryp, 20 kúdiktini ustady. Buǵan turǵyndardyń der kezinde aryzdanýy jáne polıtseılerdiń urlanǵan múliktiń ornalasqan jeri men qylmysqa qatysy bar adamdardy jedel anyqtaýy yqpal etken.
— Sonymen qatar júrgizilgen taldaý mundaı qylmystardyń basym bóligi velosıped ıeleriniń salǵyrttyǵynan bolatynyn kórsetip otyr. Kóp jaǵdaıda velosıpedter aýlalarda, kópqabatty turǵyn úılerdiń kireberisterinde, dúkenderdiń mańynda jáne ózge de qoǵamdyq oryndarda qaraýsyz qaldyrylady. Osyǵan baılanysty turǵyndardy velosıpedterdi qaýipsiz jerde saqtaýǵa jáne olardy qysqa ýaqytqa bolsa da qaraýsyz qaldyrmaýǵa shaqyramyz, — delingen aqparatta.
Eger velosıped urlyǵynyń kýási bolsańyz nemese kúmándi adamdardy baıqasańyz, bul týraly dereý 102 nómirine habarlaý qajet. Polıtseılerdiń aıtýynsha, der kezinde berilgen aqparat qylmystyń tez ashylyp, urlanǵan múliktiń ıesine qaıtarylý múmkindigin edáýir arttyrady.
Eske salsaq, osyǵan deıin ShQO-da qarýǵa qatysty zań talaptaryn buzǵan 50-ge jýyq adam jaýapqa tartylǵany habarlanǵan.
Sondaı-aq elimizde jyl basynan maýsym aıyna deıin 400-ge jýyq velosıped urlanǵany týraly jazǵan bolatynbyz.
