ShQO-da vaktsına alǵan stýdentter arasynda aqshalaı sertıfıkattar oınatylady
ÓSKEMEN. QazAqparat – Shyǵys Qazaqstan oblysynda vaktsına alǵan stýdentter arasynda aqshalaı sertıfıkattar oınatylady, dep habarlaıdy QazAqparat tilshisi.
D.Serikbaev atyndaǵy Shyǵys Qazaqstan tehnıkalyq ýnıversıtetinde vaktsınatsııalanǵan stýdentter arasynda aqshalaı sertıfıkattar oınatylmaq.
«Shart boıynsha stýdentter tamyz aıynyń 8 men 24-i aralyǵynda koronavırýs ınfektsııasyna qarsy ekpe alyp, arnaıy poshtaǵa #Stop COVID-19 heshtegimen vaktsınatsııa protsedýrasyn rastaıtyn SMS habarlamany jiberýleri qajet. 70 jeńimpaz 10 000 teńge kóleminde aqshalaı syıaqy alady», - dep habarlady bilim ordasynyń baspasóz qyzmeti.
Aıta keteıik, joǵarǵy oqý ornynda buǵan deıin de osyndaı utys oıyny uıymdastyrylyp, 50 stýdentke 15 myń teńgeden berilgen.
