ShQO-da V Dúnıejúzilik kóshpendiler oıyndarynyń júldegerleri marapattaldy
ÓSKEMEN. KAZINFORM – Shyǵys Qazaqstan oblysynda dúnıejúzilik kóshpendiler oıyndarynyń júldegerleri marapattaldy.
8-13 qyrkúıek aralyǵynda elordada ótken V Dúnıejúzilik kóshpendiler oıyndarynda shyǵysqazaqstandyq sporshylar jemisti óner kórsetken bolatyn. Búgin oblys ákimdiginde sol sportshylar saltanatty túrde marapattaldy.
«Barsha álem nazaryn ózine aýdarǵan Dúnıejúzilik kóshpendiler oıyndary óte joǵary dárejede ótti. Tipti áli kúnge deıin sol týraly talqylaýlar, jaqsy pikirler aıtylyp jatyr. Dúbirli dodaǵa Shyǵys Qazaqstannan 20 sportshy qatysqan bolatyn. Olar kóshpendiler oıyndaryna arqan tartys, dástúrli sadaq atý, taıaq tartý jáne báıge syndy sport túrlerinen baq synasyp, júlderi oryndardy ıelendi. Sizderdi osy jetistikterińizben quttyqtaı otyryp, áli de jeńisti kúnderińiz kóp bolsyn degim keledi», - dedi oblys ákiminiń orynbasary Erbol Nurǵalıev.
Arqan tartýdan Ulttyq qurama sapynda biryńǵaı Shyǵys Qazaqstan oblysynyń sportshylary jarys jolyna shyqqan. Olar joǵary nátıje kórsetip, kúmis medal ıelendi. Báıgede de shyǵystyń tulpary top jardy. 18000 metr qashyqtyqta synǵa túsken sáıgúlikter arasynda Baqtybaı Serjan tizgindegen «Holıboı» atty Kúrshimnen kelgen júırik máre syzyǵyn birinshi bolyp kesti. Osylaısha, shyǵysqazaqstandyq sportshylar lıtsenzııa alǵan sporttyń barlyq túrinen qur alaqan qaıtpady. Qorjynda altyn da, kúmis te, qola da bar.
Sportshylar jarysqa daıyndyqta, sapar kezinde qoldaý bildirgen oblys basshylyǵyna alǵystaryn jetkizdi.
«Bizdiń komandada Atyraýdan Altaıǵa deıingi ár óńirdiń sadaqshylary jınaldy. Elimizdiń namysyn birge qorǵadyq. Oıyn óte joǵary deńgeıde ótti. Fınalǵa senimdi túrde shyǵyp, Avstralııaǵa jol berdik. Jebelerimiz dóp tıgenmen jambyǵa qadalmaı jatty. Endi kelesi Dúnıejúzilik kóshpendiler oıyndaryna qyzý daıyndyq júrgizip, budan da jaqsy nátıje kórsetýge tyrysamyz. Oblys ákimdigi tarapynan bizge jan-jaqty qoldaý kórsetildi. Sol úshin rahmetimizdi aıtyp, rızashylyǵymyzdy bildirgimiz keledi», - deıdi dástúrli sadaq atýdan Qazaqstan quramasy sapynda óner kórsetken Ajar Tóleýhanova.
Shara sońynda oblys ákiminiń orynbasary Erbol Nurǵalıev sportshylarǵa qarjylaı sertıfıkattar tabys etip, aldaǵy jarystarda sáttilik tiledi.