ShQO-da úzdik ekskýrsııa júrgizýshi anyqtaldy
ASTANA. QazAqparat - Oblystyq mádenıet, muraǵattar jáne qujattama basqarmasynyń uıymdastyrýymen Semeı qalasyndaǵy tarıhı-ólketaný mýzeıinde «2016 jyldyń úzdik ekskýrsııa júrgizýshisi» atty baıqaý ótkizildi, dep jazady «Dıdar» gazeti.
Oblys qalalary men aýdandarynyń mýzeılerinen kelgen on úsh úmitker maman úsh kezeńde saıysqa tústi. Saıyskerler alǵashqy kezeńde óz ekskýrsııalarynan túsirilgen beınefılm nemese slaıdty kórermender men qazylar alqasyna usyndy.
Ekinshi kezeńde «Uly dala hıkaıalary» erkin taqyrybynda áńgimeleý, al úshinshi kezeńde mýzeıge kelgen belgili bir kórermender kontıngentine «Qosh keldińizder!» degen taqyrypta, olardy qyzyqtyratyndaı ekskýrsııa ótkizý tapsyrmasy berildi.
Osy úsh kezeńnen de joǵary ball jınaǵan Shyǵys Qazaqstan óner murajaıynyń mamany Shynar Eńsebaeva baıqaý qorytyndysynda birinshi orynǵa shyǵyp, 2016 jyldyń úzdik ekskýrsııa júrgizýshisi ataǵyn jeńip aldy. Ekinshi orynǵa Semeıdegi oblystyq tarıhı-ólketaný mýzeıiniń qyzmetkeri Aıgúl Nurabaeva, júldeli úshinshi orynǵa Nevzorovtar otbasy atyndaǵy beıneleý óneri mýzeıiniń qyzmetkeri Dınara Kákenova ıe boldy.
