ShQO-da úzdik BTR ekıpajy anyqtaldy
Shuǵyl burylystar men oı-shuńqyrǵa toly 6 shaqyrymdyq jol, qoıý tútin men jarylystar, batpaq pen tastaqty asý, sý men tereń qazylǵan or. BTR ekıpajdarynyń aldynda osyndaı kúrdeli kedergiler turdy. Pavlodar oblysynyń, Kýrchatov, Semeı jáne Óskemen qalalarynyń Ulttyq ulan sarbazdary osynaý baıraqty básekege tyńǵylyqty daıyndalyp kelgenderin kórsetip baqty. 
Eki kúnge jalǵasqan jarystyń alǵashqy kúni mı qaınatqan ystyqpen este qalsa, ekinshi kún nóserge ulasty. Degenmen, qarý-jaraǵyn jastanyp uıyqtaıtyn sarbazdarǵa bul asa qıyndyq týǵyza qoıǵan joq.
Áýeli BTR tizgindegen 3 adamdyq ekıpaj jarylys arasynan sytylyp ótip, tastaqty taýdan asty. Odan keıin jelimshe jabysqan laı-batpaq kedergini eńserip, tereń ordan ótti. Márege týra shyǵar syzyqta olardy kózge túrtse kórgisiz qoıý tútin kútip turǵan. Sonyń bárinen aman ótken ekıpaj belgilengen qashyqtyqty aman ótkergenin áıgilep, zeńbirekten oq atýy tıis boldy.
Kelesi kúni kólik júrgizýshileri de dál osyndaı kedergi-syndardan ótse, ekıpajdar BTR-men sýda júzý sheberlikterin ortaǵa saldy. Osy synaqtardyń barlyǵynynan súrinbeı ótken Kýrchatov qalasynyń №3514 áskerı bóliminiń ekıpajy tańdaýly 10 ujymnyń ishinen sýyrylyp alǵa shyqty.
Al «Úzdik júrgizýshi» ataǵyna Semeı qalasynyń №5511 áskerı bóliminiń kólik aıdaýshysy Aıdyn Omarov ıe boldy. Jeńimpazdar qyrkúıek aıynda Almaty oblysynda ótetin respıblıkalyq saıysta oblys namysyn qorǵaıdy.
«Bul jarys jyl saıyn ótedi. Ondaǵy maqsat jınaqtaǵan tájirıbemiz ben sheberligimizdi bireýge qarsy qoldaný emes. Saptaǵy sarbazdardy elekten ótkizý arqyly osal tustarymyz bolsa, sony da anyqtaýǵa bolady. Pavlodardan, Kýrchatov pen Semeıden kelgen áskerı bólimder bir alańda tájirıbe almasýda. Eń bastysy osy. Munda úzdik shyqqan sarbazdarǵa qarap qalǵan quram boı túzeıdi. Osy turǵydan alǵanda bul jarystyń bereri kóp» - dedi QR Ulttyq ulanynyń «Shyǵys» óńirlik qolbasshylyǵynyń bas qolbasshysy, general-maıor Talapker Ámrıev.
