ShQO-da uzaqqa sozylǵan talqylaýlardan keıin mektep ashanalarynyń máziri bekitildi

ÓSKEMEN. KAZINFORM – Shyǵys Qazaqstan oblysynda birneshe aıǵa sozylǵan talqylaýlardan keıin jańa tórt aptalyq mektep máziri bekitildi. 

Kásipkerler, ata-analar jáne memlekettik organdardyń birlesken jumysynyń nátıjesinde qujat ShQO Densaýlyq saqtaý basqarmasynyń buıryǵymen bekitildi.
Jańa mázirdi ázirleý jumystary osy jazdan beri júrgizilip keledi. Ata-analar komıtetteri men kásipkerler burynǵy nusqalardyń kemshilikterin aıtyp, mázirdi jańartylǵan sanıtarlyq talaptarǵa sáıkestendirýdi suraǵan.

Densaýlyq saqtaý basqarmasynyń málimetinshe, eń kúrdeli másele - tuz, qant, sút ónimderine qoıylǵan jańa normalardy saqtaý jáne maýsymdyq tamaqtanýdy durys teńestirý bolǵan.

– Jańa mázir QR Densaýlyq saqtaý mınıstriniń № DSM-302/2020 buıryǵyndaǵy talaptarǵa tolyq sáıkes keledi. Onda et, balyq, kókónis jáne sút taǵamdarynyń berilý jıiligi, jańa jemister men kókónister normasy saqtalǵan. Biz taǵam men sýsyn túrlerin balalarǵa paıdaly etýge qol jetkizdik. Mysaly, kakaony shaımen almastyrý sııaqty túzetýler taǵamnyń qunarlylyǵyna áser etpeı, normalarǵa saı keledi, - deıdi basqarma mamandary.

Túski as energetıkalyq qundylyǵy balanyń jasyna qaraı táýliktik qajettiliktiń 25-30%-yn jabatyndaı eseptelgen. Tuz ben qant mólsheri jańa mekteptiń tamaqtandyrý standartyna tolyq sáıkestendirilgen.

ShQO Kásipkerler palatasynyń quqyqtyq máseleler jónindegi dırektordyń orynbasary Aıjan Jáńgirhanovanyń aıtýynsha, ortaq sheshimge kelý barlyq taraptardyń birlesken jumysy arqyly múmkin boldy.

– Biz ondaǵan talqylaý ótkizdik. Ata-analar men bıznes ókilderiniń pikirleri árdaıym sáıkes kele bermedi. Biraq báriniń talaptaryn eskeretin ortaq qujat ázirleı aldyq, - deıdi ol.

Kásipkerlerdiń tamaqtandyrý assotsıatsııasynyń tóraǵasy Marına Lapteva da mázirdiń bekitilýi mektep ashanalarynyń jumysyn turaqtandyrýǵa múmkindik beretinin atap ótti.

– Buryn talaptar ózgergen saıyn tehnologııalyq kartalardy jıi túzetýge týra keletin. Endi qolymyzda naqty, bekitilgen qujat bar. Bul satyp alýdy josparlaýǵa jáne balalardy tolyqqandy tamaqpen qamtamasyz etýge jaǵdaı jasaıdy, - deıdi Marına Lapteva.

Eske salsaq, osyǵan deıin ShQO mektepterinde oqýshylar áli kúnge deıin eski mázir boıynsha tamaqtanatyny jaıly jazǵanbyz.