ShQO-da uıymdasqan qylmystyq toptan 380 keliden astam esirtki tárkilendi
ShQO Polıtsııa departamenti baspasóz qyzmetiniń málimetine súıensek, polıtsııa qyzmetkerleri Ulttyq qaýipsizdik komıtetimen birlesip, Ońtústik óńirden Shyǵysqa esirtki zattaryn jetkizýmen aınalysqan qylmystyq toptyń jolyn kesý úshin arnaıy operatsııa ótkizdi.
«Sáýir aıynyń sońynda Esirtki qylmysyna qarsy is-qımyl basqarmasynyń qyzmetkerleri buryn sotty bolǵan Jambyl oblysy turǵynynyń sybaılastarymen birge esirtki arnalaryn uıymdastyryp otyrǵany týraly aqparat alǵan. Ol marıhýana men gashıshti júk kóligindegi jasyryn orynǵa salyp, Óskemen qalasyna ótkizý úshin jetkizip otyrdy. Osy shemanyń barlyq qatysýshylary, onyń ishinde esirtkini shahar turǵyndaryna satýdy tikeleı júzege asyrǵan adamdardyń jeke bastary anyqtalǵannan keıin quqyq qorǵaýshylar olardy ustaýǵa kiristi», - dep habarlady vedomstvo ókilderi.
Bastapqyda esirtki ótkizgen 43 jastaǵy qala turǵyny ustaldy. Odan 1,5 keli marıhýana tárkilengen. Sodan keıin garaj kooperatıvteriniń birinen esirtki qoımasy tabyldy, onda «qoımashy» degen laqap aty bar 40 jastaǵy Óskemen turǵyny qalaǵa ákelingen esirtkini saqtap kelgen. Ol jerden 74 keliden astam marıhýana men 1,7 keli gashısh alyndy.
Arnaıy operatsııanyń sońǵy kezeńinde oblys ortalyǵyna asa iri kólemdegi esirtkini taǵy da ákelý kezinde 50 jastaǵy jambyldyq quryqtaldy. Onyń basqarýyndaǵy júk kóligi shanaǵynyń aldyńǵy bóligindegi arnaıy jabdyqtalǵan jasyryn orynnan 300 keliden astam marıhýana jáne 8 kelige jýyq gashısh tabylǵan.
«Osy esirtki arnasyn joıý barysynda 380 keliden astam ártúrli esirtki zattary alyndy. Qazirgi ýaqytta kúdiktilerge qatysty QR QK-niń 297-babyna sáıkes tergeý amaldary júrgizilýde. Atalǵan qylmys úshin olar 15 jylǵa deıingi merzimge bas bostandyǵynan aıyrylýy múmkin». Aldyn ala málimet boıynsha tárkilengen esirtki zattarynyń «qara naryqtaǵy» quny 320 mıllıon teńgeden asady», - dedi ShQO PD bastyǵy, polıtsııa polkovnıgi Saǵat Mádıev.
