ShQO-da uıqyda jatqan 6 bala datchık dybysynan oıanyp órtengen úıden shyǵyp úlgerdi
ÓSKEMEN. QazAqparat – Shyǵys Qazaqstan oblysy Glýbokoe aýdanynda 6 bala órtten zardap shege jazdady, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, Glýbokoe aýdany Beloýsovka kentindegi Sovetskaıa kóshesinde jer úıde órt shyqty. Úı ıesi syrtta júrip tútindi baıqap qalǵan. Ol 6 bala uıyqtap jatqan úıge qaraı júgirdi.
«Ákeleri kelip jetkenshe aýdandyq TJB qutqarýshylary buryn ornatqan datchıktiń dybysyn estigen 3 bala oıanyp ketken. Olar lezde qalǵan úsheýi men anasyn turǵyzdy. Osylaısha, barlyǵy órtenip jatqan úıden syrtqa shyǵyp úlgerdi», - delingen aqparatta.
Úı ıesi jalyndy óz betinshe óshirýge tyrysqan. Alaıda onysynan túk shyqpady. Buny kórgen kórshileri «101» qyzmetine habar berdi.
«Oqıǵa ornyna kelip jetken órt sóndirýshiler 120 sharshy metr aýmaqqa jaıylǵan qyzyl jalyndy aýyzdyqtady. Aldyn ala málimet boıynsha órttiń shyǵý sebebi – elektr jabdyqtaryn paıdalaný kezinde qaýipsizdik talaptaryn saqtamaý», - delingen habarlamada.
Esterińizge sala ketsek, osyǵan deıin Semeıde 160 gektar aýmaqta orman órtenip jatqanyn habarlaǵan edik.
