ShQO-da úıqamaq tártibin buzǵan er adam túrmege qamaldy
ÓSKEMEN. KAZINFORM - Shyǵys Qazaqstan oblysynda probatsııa qyzmetiniń baqylaýynan jasyrynbaq bolǵan azamat bas bostandyǵynan aıyryldy. Ol elektrondy bilezigin sheship, úıinen ruqsatsyz shyǵyp ketken.
Probatsııa qyzmetiniń esebinde turǵan er adam elektrondy baqylaý qurylǵysynan qutylmaq bolǵan. Ol aıaǵyndaǵy elektrondy bilezikti sheship, sot belgilegen aýmaqtan óz betinshe shyǵyp ketken. Alaıda onyń bul áreketi baqylaý júıesinen jasyryn qalmady. Elektrondy qurylǵy baılanys úzilgeni jáne belgilengen aýmaqtan shyqqany týraly dabyl sıgnalyn birden ınspektorlarǵa jibergen.
Probatsııa qyzmetiniń ınspektory dereý polıtsııanyń Jedel basqarý ortalyǵyna habar berdi. Ortalyq operatorlary qaladaǵy beınebaqylaý kameralary arqyly er adamnyń qozǵalys baǵytyn anyqtap, júrgen jerin tapqan. Naqty mekenjaı ınspektorlarǵa berilip, olar oqıǵa ornyna jedel jetip, quqyq buzýshyny ustady.
Osy áreketi sottalǵan azamattyń bas bostandyǵynan aıyrylýyna sebep boldy. Sot belgilegen shekteýlerdi óreskel buzǵany úshin oǵan qatysty materıaldar sotta qaraldy. Nátıjesinde sot jazanyń ótelmegen bóligin bas bostandyǵynan aıyrý jazasyna aýystyrý týraly sheshim qabyldady. Keıin ol qylmystyq-atqarý júıesi mekemesine jetkizildi.
– Tsıfrlyq baqylaý probatsııa qyzmetiniń múmkindikterin edáýir keńeıtedi. Bul jaǵdaıda júıeden ýaqytyly túsken dabyl, Jedel basqarý ortalyǵymen birlesken jumys jáne qyzmetkerlerimizdiń jedel áreketi quqyq buzýshynyń júrgen jerin anyqtap, ony ustaýǵa múmkindik berdi. Probatsııa adamǵa qoǵamnan oqshaýlanbaı túzelýge múmkindik beredi. Alaıda bul múmkindik zańda belgilengen barlyq talaptardy saqtaýdy mindetteıdi, – deıdi ShQO boıynsha QAJ departamentiniń resmı ókili Saltanat Ojıkanova.
Eske salsaq, osyǵan deıin Qyzylordada probatsııa talaptaryn buzǵan turǵyn sot zalynan qamaýǵa alynǵany habarlanǵan.