ShQO-da úıde súndetke otyrǵan 3 bala aýrýhanadan bir-aq shyqty
ÓSKEMEN. KAZINFORM — Shyǵys Qazaqstan oblysynda úıde súndettelgen úsh bala aýrýhanaǵa tústi.
ShQO Ana men bala ortalyǵynyń málimetinshe, barlyq úsh jaǵdaı da Óskemen qalasynda bolǵan. Úıde balalardy súndetke otyrǵyzýmen aınalysa bastaǵan azamat tıisti talaptardy saqtamaǵan. Sonyń saldarynan qabyný men qan ketý belgileri bar úsh naýqas aýrýhanaǵa jetkizildi.
— Naýqastarǵa medıtsınalyq kómek kórsetildi. Bir bala hırýrgııa jáne ýrologııa bólimine jatqyzyldy. Ol tórt kún boıy qajetti em qabyldap jatyr, — dedi Ana men bala ortalyǵynyń hırýrgııa jáne ýrologııa bóliminiń meńgerýshisi Qaırat Raqymjanov.
Dárigerler súndetke otyrǵyzýdyń turmystyq dástúr sanalatynyna qaramastan, bul tolyqqandy hırýrgııalyq jolmen jasalatynyn atap ótti. Ol qaýipsizdik talaptaryn qatań saqtaýdy qajet etedi.
— Kez kelgen operatsııa aseptıka jáne antıseptıka talaptaryn saqtaı otyryp jasalady. Statsıonar jaǵdaıynda sterıldi orta, qajetti qural-jabdyqtar men dári-dármekter, naýqastyń jaǵdaıyn barlyq kezeńde baqylap otyratyn mamandar bar. Mundaı rásimderdi medıtsınalyq emes jaǵdaıda jasaý asqynýlarǵa ǵana emes, ınfektsııa juqtyrý qaýpine de ákelip soǵýy múmkin, — dep eskertti dárigerler.
Mamandar ata-analardy balalardyń densaýlyǵyna qaýip tóndirmeýge jáne tek lıtsenzııasy bar medıtsınalyq mekemelerge júginýge shaqyrdy.
Osyǵan deıin Qazaqstanda súndetke otyrǵyzý qyzmeti qansha turatynyn jazdyq.
