ShQO-da ústerine sylaq qulaǵan oqýshylar aýrýhanadan shyǵarylady
ÓSKEMEN. QazAqparat - Shemonaıha aýdanynyń Ýst-Talovka aýylyndaǵy mektepte tóbeniń sylaǵy qulap zardap shekken oqýshylar juma kúni aýrýhanadan shyǵarylatyn boldy, dep habarlaıdy «QazAqparat» HAA tilshisi.
«Men balalardyń jaǵdaıy jaqsarǵanyn tolyq senimmen aıta alamyn. Olar apta boıy emdeldi. Qajetti ÝDZ-túsirilimderi jasaldy, olardy oblystyq neırohırýrgter, travmatologtar jáne basqa da mamandar qarady», - dedi QazAqparat tilshisine aýdan ákiminiń orynbasary Vıka Lısına.
Aıta keteıik, 17 qarasha kúni tústen keıingi úzilis kezinde Ýst-Talovka aýylyndaǵy orta mektepte tóbeniń sylaǵy qulaǵan. Sol kezde synyp ishinde 3 «B» oqýshylary oınap júrgen. Qalyńdyǵy 10 sm sylaq tıgen úsh balaǵa bas-súıek jaraqaty degen dıagnoz qoıylyp aýdandyq aýrýhananyń jan saqtaý bólimine jetkizildi.
Ákim orynbasarynyń aıtýynsha, oblys ortalyǵynan kelgen neırohırýrg pen travmotolog túsirilgen rentgennge qaraı otyryp jáne muqııat tekserýden keıin aýdandyq dárigerlerdiń bastapqy dıagnozyn joqqa shyǵarǵan.
Bastaýysh synyp oqýshylary bilim alyp jatqan mektep - 1961 jyly salynǵan mekteptiń eski ǵımaraty. 1982 jyly jańa mektep salynǵan kezde eski ǵımarat jańa mekteppen dálizimen arqyly qosylǵan. Tótenshe jaǵdaıdan keıin sabaqtar mekteptiń negizgi bóligine aýystyryldy.
Óńirlik polıtsııasy bul derekti sotqa deıingi tergeýdiń biryńǵaı tizilimine tirkep, QR QK-niń 141-baby 1-bóligimen (Balalardyń ómiri men densaýlyǵy qaýipsizdigin qamtamasyz etý boıynsha mindetterin tıisti deńgeıde oryndamaý) sotqa deıingi tergeý amaldaryn bastady. 
