ShQO-da ustazdardy yntalandyrý úshin tósbelgi jáne aqshalaı syıaqy beriledi
ÓSKEMEN. QazAqparat – Shyǵys Qazaqstan oblysynda úzdik muǵalimderge tósbelgi jáne 600 myń teńge aqshalaı syıaqy beriledi, dep habarlaıdy QazAqparat tilshisi.
Bıylǵy oqý jylynda óńir ákiminiń atynan alǵash ret pedagogtarǵa «Shyǵys Qazaqstan oblysynyń bilim berý isine qosqan úlesi úshin» qurmetti ataǵy, 600 myń teńge aqshalaı syıaqy jáne «ShQO eńbek sińirgen ustazy» tósbelgisi beriletin bolady. Bul týraly dástúrli tamyz konferentsııasy kezinde aıtyldy. Osyndaı marapattardy bilim berý júıesine úlken úles qosqan pedagogtar ıelenbek.
«Ótken jyly «Pedagog mártebesi týraly« zań qabyldandy. Bul ustazdardyń eńbek jaǵdaıyn jaqsartýǵa jáne jalaqysyn arttyrýǵa múmkindik berdi. Búgingi tańda oblystaǵy 24 045 pedagogtyń 13 916-sy jańa format boıynsha attestattaýdan ótip, óz jalaqysyn 30%-dan 50%-ǵa deıin kóterdi. Ótken oqý jylynan bastap alǵash ret 800 pedagog magıstratýraǵa 26 myń teńge kóleminde qosymsha aqy aldy», - deıdi ShQO Bilim basqarmasynyń basshysy Saırangúl Jumadilova.
Jańa oqý jylynan bastap pedagogtardy jumysqa qabyldaý júıesi ózgeredi. Eger buryn jumysqa dırektor alsa, endi tıisti biliktilik talaptaryna sáıkes konkýrs elektrondyq formatta ótkiziletin bolady.
«Qyrkúıek aıynan bastap bilim berý uıymdarynyń dırektorlaryn taǵaıyndaýdyń jańa júıesi engiziledi. Bul birinshi basshylarǵa qoıylatyn biliktilik talaptaryna sáıkes júrgiziledi. Pedagogıkalyq qyzmetke alǵash kirisetin JOO túlekteri de «Pedagog« biliktiligin alý úshin Ulttyq biliktilik testinen ótýi tıis», - dedi Saırangúl Jumadilova.
