ShQO-da ustalǵan adamǵa elektroshoker qoldanǵan polıtseıge qatysty úkim ózgerissiz qaldy
ASTANA. QazAqparat - Shyǵys Qazaqstan oblystyq sotynda ustalǵan adamǵa elektroshoker qoldanyp soqqyǵa jyqqany úshin aıyptalǵan Katonqaraǵaı AІІB-niń polıtsııa ınspektoryna qatysty sot úkimi kúshinde qaldy, dep habarlaıdy «QazAqparat» HAA tilshisi.
Katonqaraǵaı aýdandyq soty bunyń aldynda ustalǵan adamǵa kúsh qoldanyp, bılikti asyra paıdalanǵany úshin polıtsııa qyzmetkerin 5 jyl merzimge sottaǵan bolatyn. Sot protsesi barysynda anyqtalǵandaı, ýchaskelik polıtsııa ınspektory A. Úlken Naryn aýylyndaǵy polıtsııa bólimshesine mas kúıinde jetkizgen azamat B.-ny eshbir sebepsiz soqqyǵa jyqqan. Ary qaraı, elekroshokerdiń kómegimen jábirlenýshiniń denesine qasaqana dene jaraqatyn salǵan. Toqtyń áserinen B.-nyń denesinde kúıikter paıda bolǵan. Osydan keıin, ýchaskelik polıtsııa ınspektory er adamdy aýyl syrtyna aparyp tastap ketken.
«Tirkelgen oqıǵa jaıyndaǵy is qujattar ShQO prokýratýrasyna tústi. Budan keıin tergeýmen sybaılas jemqorlyqqa qarsy qyzmet aınalysty. Memlekettik aıyptaýshy sot protsesi barysynda sottalýshyny kináli dep tanýdy surady. Sot úkimimen polıtsııa qyzmetkeri ómir boıy memlekettik qyzmette eńbek etý quqyǵynan aıyrylyp, 5 jylǵa túrmege toǵytyldy», - dep habarlaıdy ShQO prokýratýrasynan.
