ShQO-da úshinshi maı óńdeý zaýyty ashylady

ÓSKEMEN. QazAqparat – Shyǵys Qazaqstan oblysynda jańadan maı óńdeý zaýyty iske qosylady. Bul týraly agrosektordy damytý máseleleri boıynsha jınalys ótkizgen aımaq basshysy Danıal Ahmetov aıtty, dep habarlaıdy QazAqparat tilshisi.

«Bizge maıly daqyldardyń egis alqabyn ulǵaıtý qajet. Óıtkeni qazirgi ýaqytta óńir boıynsha eki maı óńdeý zaýyty jumys isteýde. Al úshinshisi jaqyn arada iske qosylmaq. Bul daqyldarǵa 484,7 myń ga egistik jer qarastyrylǵan», - dedi ol.

Onyń aıtýynsha, kartop egýge nazar aýdarý kerek. Sýarmaly jerler qandaı aýmaqty alyp jatqanyn jáne jeke qosalqy sharýashylyqtarda qansha kartop ósiriletinin anyqtaǵan jón.

«Aldaǵy egistik jumystaryna tyńaıtqyshtar daıyndaldy. 33 myń tonna otyn qory bar. Jalpy, agrosektordy damytýǵa alty mlrd teńge kóleminde sýbsıdııa bólý josparlanyp otyr. Jaqyn arada men keıbir jaıttardy talqylaý úshin iri sharýa qojalyqtarynyń basshylarymen kezdesemin», - dedi Danıal Ahmetov.