ShQO-da úsh táýlik boıy adasyp júrgen Reseı azamaty qutqaryldy
ASTANA. QazAqparat - Úsh táýlik boıy habarsyz ketken 57 jastaǵy reseılik azamattyń týystary qazaqstandyq tártip saqshylarynan jáne qutqarýshylardan kómek surady. Anyqtalǵandaı, jergilikti jerdiń oı-shuńqyryn durys bilmeıtin kórshi eldiń azamaty Shemonaıhadan Óskemenge kele jatyp adasyp ketken, dep habarlaıdy «QazAqparat» HAA tilshisi ShQO TJD resmı saıtyna silteme jasap.
Іz kesýshi ıt ertken 4 adamnan quralǵan qutqarýshy top taýly jerlerge arnalǵan «KAMaZ» arnaıy tehnıkasymen joǵalǵan adasqan adamdy izdeýge shyqty.
«Biz negizgi tas joldan aýyldarǵa qaraı burylyp orman jaǵalap júrip otyrdyq. Shamamen jol boıynan 9 shaqyrym qashyqtyqtan izdegen adamymyzdy jáne onyń kóligin taptyq. Onyń uıaly telefony da, avtomobıliniń akkýmýlıatory da otyryp qalǵan. Azyǵy bar eken, biraq birneshe táýlik boıy sýyq kóliktiń ishinde ábden tońyp qalǵan. Eń birinshi suraǵany ystyq sýsyn boldy», - deıdi TJD qutqarýshysy Evgenıı Jıgýlın.
Qutqarý qyzmetiniń mamandary onyń kóligin otaldyrýǵa kómektesip, negizgi kúre jolǵa deıin shyǵaryp saldy.
Osy rette ShQO TJD qyzmeti azamattarǵa meıram kúnderi qarsańynda qala syrtyna shyǵarda aýa-raıyn baqylap, joldy qysqartý maqsatynda negizgi joldan shyǵyp táýekel etpeýin suraıdy.
