ShQO-da úsh kúnde 146 turmystyq zorlyq-zombylyq faktisi tirkeldi
ÓSKEMEN. QazAqparat – Shyǵys Qazaqstan oblysynda úsh kúnde 146 turmystyq zorlyq-zombylyq faktisi tirkeldi, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetinshe, tártip saqshylary «Turmys» jedel aldyn alý sharasyn júrgizdi. Shara barysynda profılaktıkalyq esepte turǵan azamattarǵa erekshe nazar aýdarylǵan. Jalpy sany 4800-den astam adam turǵylyqty mekenjaıy boıynsha tekserildi. Úsh kún ishinde turmystyq zorlyq-zombylyqtyń 146 faktisi tirkelgen.
«Nátıjesinde 93 adamǵa alkogoldi ishimdik ishýge tyıym salyndy. 1362 azamatqa qatysty qorǵaý nusqamasy, 671 adamǵa erekshe talaptar belgilendi. Kámelettik jasqa tolmaǵan balalardy tárbıeleý jáne bilim berý, onyń quqyqtary men múddelerin qorǵaý jónindegi mindetterdi oryndamaǵany úshin ÁQBtK-niń 127-babyna sáıkes 36 ata-ana jaýapqa tartyldy», - delingen habarlamada.
Sondaı-aq 40 qolaısyz otbasy esepke qoıylyp, 28 ata-anaǵa qatysty materıaldar kámeletke tolmaǵandardyń isteri jáne olardyń quqyqtary jónindegi komıssııaǵa joldandy.
