ShQO-da úsh aýysymdy oqý júıesi túbegeıli joıyldy
ÓSKEMEN. QazAqparat - Bıyl Shyǵys Qazaqstanda 3 jańa mektep qoldanysqa beriledi. Osynyń arqasynda oblysta úsh aýysymdy oqý júıesi atymen joıylady, dep habarlaıdy QazAqparat tilshisi.
Jańa oqý jylynda esigin aıqara ashatyn bilim oshaǵynyń biri Tarbaǵataı aýdanynyń Aqjar aýylynda salynyp jatyr. 600 oryndyq mekteptiń janynan 300 oryndyq ınternat ta boı kótergen. Aqjarǵa irgeles eldi mekenniń oqýshylary osy ınternatta turyp bilim alatyn bolady. Taǵy bir 600 oryndyq mektep Aıagóz qalasynyń ońtústik bóligindegi «Áskerı qalashyqta» ashylady.
«Aıagóz qalasynda mektep tapshylyǵy bar bolatyn. Sonyń saldarynan mundaı 3 aýysymdyq oqý júıesi jumys istep keldi. Jańa mektep osy máseleni túbegeıli sheshti. Endi oblys mektepteri 100% 2 aýysymdyq júıemen bilim beredi» - deıdi oblystyq bilim basqarmasynyń materıaldyq-tehnıkalyq baza boıynsha menedjeri Larısa Kýprına.
Bıyl qoldanysqa beriletin úshinshi mektep Úrjar aýdanynyń Maqanshy aýylynda ashylady. Onyń syıymdylyǵy - 320 oryn.
Jalpy, oblys kóleminde alty birdeı bilim berý nysany salynýda. Onyń barlyǵy qoldanysqa berilgende 3820 bala mekteppen qamtylady dep josparlanǵan. Salynyp jatqan nysannyń bireýi mektepke qosalqy ǵımarat bolsa, qalǵan eki mektep aldaǵy jyly esigin ashýy tıis.
