ShQO-da urlyq jasaǵany úshin sottalǵan er adam 12 kúnnen keıin amnıstııamen bosap shyqty

ÓSKEMEN.KAZINFORM — Shyǵys Qazaqstan oblysynda urlyq jasaǵany úshin sottalǵan er adam jaza merziminiń nebári 12 kúnin ótedi.

ShQO boıynsha QAJ departamentiniń málimetinshe, 38 jastaǵy azamat urlyq jasaǵany úshin sottalǵan. Ol probatsııalyq esepke alynǵannan keıin 12 kún ótken soń QR Konstıtýtsııasynyń 30 jyldyǵyna oraı jarııalanǵan amnıstııaǵa iligip, tolyq bosatyldy.

Onyń 1 jyl 3 aıǵa jýyq ótelmegen jazasy sot sheshimimen kúshin joıdy. Sot otyrysynda er adam birden bosatyldy.

— Bul men úshin úlken sabaq boldy. Budan bylaı osyndaı qatelikke jol bermeýge tyrysamyn. Qazir turaqty jumysym bar. Ómirdi jańadan bastaýǵa daıynmyn. Amnıstııa men úshin kútpegen syılyq boldy, — dedi ol.

Marqakól aýdanynyń probatsııa qyzmetiniń aǵa ınspektory, ádilet kapıtany Aıaýlym Muratbekqyzy atalǵan azamatqa kórsetilgen qoldaý týraly aıtyp berdi. 

— Probatsııalyq baqylaýǵa alynǵan adamdarǵa tek qadaǵalaý júrgizip qana qoımaı, olardyń qoǵamǵa qaıta beıimdelýine kómek kórsetý — bizdiń basty mindetimiz. Biz bul azamatty birden jergilikti sharýa qojalyǵyna jumysqa ornalastyryp, turaqty tabys tabýyna jaǵdaı jasadyq, — dedi ınspektor.

Eske salsaq, osyǵan deıin túrmeden shyqqandarǵa qandaı kómek kórsetiletindigi habarlanǵan.