ShQO-da ury tórt usaq maldy jeńil kólikke tıep áketken bolǵan
ASTANA. KAZINFORM — Zaısan tasjolynda urlanǵan mal tıelgen kólik toqtatyldy, dep habarlaıdy QR ІІM baspasóz qyzmeti.
Shyǵys Qazaqstan oblysynda «Beket» jedel-profılaktıkalyq is-sharasy aıasynda polıtsııa qyzmetkerleri mal urlyǵy faktisiniń jolyn kesti.
Maıqapshaǵaı — Zaısan tasjolyn patrýldeý kezinde tártip saqshylary 43 jastaǵy er adam tizgindegen Mitsubishi Galant avtokóligin toqtatqan. Kólikti tekserý barysynda salonnan ilespe qujattary joq tórt usaq mal tabyldy.
— Tekserý nátıjesinde atalǵan maldyń jergilikti turǵynnan urlanǵany anyqtaldy. Aldyn ala málimet boıynsha kúdikti maldy keıinnen satý maqsatynda alyp ketpek bolǵan, alaıda polıtsııa qyzmetkerleri jolyn kesti. Atalǵan fakti boıynsha sotqa deıingi tergep-tekserý bastaldy. Urlanǵan mal tárkilenip, zańdy ıesine qaıtaryldy, — delingen habarlamada.
Buǵan deıin óńirde osyǵan uqsas oqıǵalar tirkelgen. Máselen, oblystyń Ulan aýdanynda jeńil kólik salonyna urlanǵan jylqyny tirideı salyp alǵan er adam ustaldy.
