ShQO-da ýly gazdy anyqtaıtyn datchıkterdiń arqasynda 29 adam qutqaryldy
ÓSKEMEN. QazAqparat – Shyǵys Qazaqstan oblysynda ýly gazdy anyqtaıtyn datchıkterdiń arqasynda 29 adam qutqaryldy, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, kóp jaǵdaıda pesh paıdalaný kezinde qarapaıym erejelerdiń saqtalmaýy saldarynan óńir turǵyndaryna ıis tıip jatady. Jyl basynan beri aımaqta 9 adam osylaı zardap shekken.
Oqıǵanyń barlyǵy turǵyndar uıyqtap jatqan kezde boldy. Sondyqtan ýly gazdy anyqtaıtyn datchıkti qoldaný – qorǵanýdyń eń tıimdi tásilderiniń biri. Sońǵy úsh jylda oblys halqynyń úılerine ornatylǵan datchıkter 29 azamattyń, onyń ishinde 23 balanyń ómirin saqtap qalǵan.
Máselen, bıyl Glýbokoe aýdanynyń Beloýsovka aýylynda úıde órt shyqty. Úı ıesi tútindi baıqaǵan kezde baqshada bolǵan edi. Ol lezde 6 balasy uıyqtap jatqan úıge qaraı júgirdi. Al buǵan deıin qutqarýshylar ornatqan datchıktiń dybysyn estigen 3 bala oıanyp ketipti. Olar anasymen birge qalǵandaryn turǵyzyp, janyp jatqan úıden shyǵyp úlgerdi.
Ulan aýdany Tavrııa aýylynda eki jyl buryn datchık 5 balany qutqaryp qalǵan. Úıde kómirtegi gazy baıqalǵan kezde datchık dabyl qaǵady. Osylaısha, otbasy músheleri der kezinde dalaǵa shyqqan.
«Jyl saıyn múgedekter, kópbalaly jáne az qamtylǵan otbasylar, jalǵyzbasty qarttar úılerine ýly gazdy anyqtaıtyn datchıkterdi ornatý jumystary júrgizilýde. Bıylǵy jylytý maýsymynda 3000-nan astam otbasyn datchıkpen qamtamasyz etemiz», - deıdi oblystyq TJD bastyǵynyń orynbasary Serik Amangeldın.
