ShQO-da Ulttyq ulan qyzmetkerleri baspanaly bolyp jatyr
Áskerılerdi pátermen qamtýǵa arnalǵan memlekettik baǵdarlama arqyly Ulttyq ulan qyzmetkerleri de baspanaly bolýda. Solardyń biri - óskemendik aǵa serjant Talǵat Mergembaev.
«2008 jyldan beri №6699 áskerı bóliminde qyzmet etip kelemin. Osynda júrip otaý qurdym, qazir úsh balam bar. Sodan beri páterden-páterge kóship keldik. Qonys aýystyrǵan saıyn balalardy jańa balabaqsha men mektepke aýystyrý kerek boldy. Áıelim de bir jerde turaqtap jumys isteı almady» - deıdi Talǵat Mergembaev.
Úsh bólmeli páterge qol jetkizý úshin aǵa serjant Askeri.baspana.kz portalynda konkýrstan ótken. Alǵashqy jarnaǵa páter qunynyń 20 paıyzyn salǵan. Nesıeniń paıyzdyq mólsherlemesi - 8 paıyz.
«Jyl aıaǵyna deıin atalmysh baǵdarlama arqyly Shyǵys óńirlik qolbasshylyǵyna qarasty áskerı bólimderdiń 100-ge jýyq qyzmetkeri baspanaly bolady. Áskerıler Pavlodar, Óskemen, Semeı Kýrchatov qalalary men Ulan aýdanynyń Q.Qaısenov kentinde páter alýǵa ótinish ótkizip otyr» - deıdi «Shyǵys» óńirlik qolbasshylyǵy baspasóz qyzmetiniń bastyǵy Baǵdat Amangeldi.
Buǵan deıin habarlaǵanymyzdaı, nesıeler Qazaqstannyń Turǵyn úı qurylys jınaq banki arqyly beriledi. Áskerıler úshin jeńildetilgen nesıeniń úsh túri qarastyrylǵan. Konkýrs kezinde eńbek ótili jáne qajetti alǵashqy jarnanyń bar-joǵy eskeriledi. Áskerı qyzmetshiniń nesıesi turǵyn úı tólemderi negizinde beriletin qarajat esebinen óteledi.
Qazaqstanda shamamen 70 myńǵa jýyq áskerı qyzmetshi baspanaǵa muqtaj. Bul azamattardyń páter máselesi aldaǵy 5-6 jyldyń ishinde sheshiletini kútilýde.
Sondaı-aq aıta keteıik, senatorlarmen bolǵan kezdesýde QR Qorǵanys mınıstriniń orynbasary Talǵat Janjúmenov baspana tólemderin esepteý júıesin ózgertýdi usyndy. Sebebi Turǵyn úı qurylys jınaq banki arqyly baspanaly bolý úshin alǵashqy jarnany jınaý qajet. Al óńirlerdegi áskerı qyzmetshilerge beriletin turǵyn úı tólemderiniń tómen kólemi buǵan múmkindik bermeıdi.
Belgili bolǵandaı, atalǵan tólemderdiń eń tómen deńgeıi Jambyl oblysynda (18 myń teńge) bolsa, al eń joǵary soma - Almaty men Astanada.
«Osy oraıda 18 myń teńgege jınaq júrgizý qıynǵa túsedi. Máseleni sheshý úshin birqatar usynysty qarastyryp otyrmyz. Birinshi nusqa boıynsha barlyq osy tólemderdi jalpy respýblıkalyq etýge negizdelgen, ıaǵnı el boıynsha bir deńgeıge shyǵarý. Alaıda bul jaǵdaıda Almaty, Astana jáne elimizdiń batys óńirlerindegi áskerılerge qıyn bolady. Olarǵa arnalǵan tólemder azaıyp ketedi, sáıkesinshe atalǵan óńirlerdegi áskerı qyzmetshiler de qajetti somany jınaı almaı qalady. Ekinshi nusqaǵa toqtalsaq, olardy eki sanatqa bólý qarastyryldy. Birinshi sanatqa Almaty, Astana, Aqtaý, Atyraý áskerılerin, al ekinshi sanatqa qalǵan qalalardy engizý eskerildi. Qazirgi kezde tıisti esep-qısapty júrgizip jatyrmyz. Budan bólek, úshinshi nusqada jınaq bóligin el boıynsha ortasha deńgeıde belgilep, al arendalyq bóligin óńirler boıynsha saralaý usynyldy. 26 qazanda osy jumystarǵa kiristik. Onyń qorytyndysy boıynsha barlyq máseleni Qarjy mınıstrligimen kelisip, tıisti usynysty engizemiz», - dedi Talǵat Janjúmenov.
