ShQO-da úleskerlerdiń 1,2 mlrd teńgesin jumsap tastaǵan qurylys kompanııalary sotqa tartylady
ÓSKEMEN. KAZINFORM — Shyǵys Qazaqstan oblysynda páter satyp alýshylardan túsken qarajatty turǵyn úı qurylysyna emes, jeke maqsattaryna jumsaǵan qurylys kompanııalary sot aldynda jaýap beredi.
Tergeýdiń aıaqtalǵany týraly Óńirlik kommýnıkatsııalar qyzmetinde ótken baspasóz konferentsııasynda ShQO boıynsha Ekonomıkalyq tergep-tekserý departamenti Tergeý basqarmasynyń basshysy Qýat Rahymbaev málimdedi.
— Úleskerlerdiń qarajatyn maqsatsyz paıdalaný deregi boıynsha qurylys kompanııalaryna qatysty qylmystyq is sotqa joldandy. Zańsyz jolmen alynǵan qarajat kólemi 1,2 mlrd teńgeni qurady, — dedi Qýat Rahymbaev.
Endi aıyptalýshylardyń áreketine quqyqtyq baǵany sot beredi. Sondaı-aq zardap shekken azamattarǵa keltirilgen shyǵyndy óteý tártibi de sotta aıqyndalady.
Osy rette, vedomstvo ókilderi óńir turǵyndaryna salynyp jatqan úıden páter satyp almas buryn qurylys kompanııasynyń ákimdikten úleskerlerdiń qarajatyn tartýǵa berilgen resmı ruqsaty nemese turǵyn úı qurylysynyń biryńǵaı operatorynyń kepildigi bar-joǵyn tekserýge keńes beredi.
Eske salsaq, osyǵan deıin elorda turǵyndaryn Bekturov kóshesindegi bıznes ortalyqtyń qurylysy alańdatqany habarlanǵan.