ShQO-da úleskerlerden zańsyz aqsha almaq bolǵan 4 qurylys kompanııasy jaýapqa tartyldy
ShQO memlekettik sáýlet-qurylys baqylaýy basqarmasynyń málimetine súıensek, óńirde úleskerlerden zańsyz aqsha alýǵa árekettengen qurylys kompanııalaryna tıisti shara qoldanylýda.
«Turǵyn úı qurylysyna úlestik qatysý týraly» zańnyń 7-baby 1-tarmaǵyna sáıkes, úı qurylysyna úlestik qatysýdyń ózindik tártipteri bar. Atap aıtqanda, qurylys kompanııasy biryńǵaı operator – «Qazaqstan turǵyn úı kompanııasy» AQ-men kepildik shart jasasýǵa mindetti. Sondaı-aq ekinshi deńgeıli banktiń jobasyna qatysýy, úleskerlerden qarajat tartý úshin jergilikti atqarýshy organnan ruqsat alýy qajet. Taǵy bir talap – kóppáterli úıdiń qańqasy salynǵannan keıin ǵana úleskerlerden aqsha tartýǵa ruqsat etilgen», - deıdi basqarma basshysynyń orynbasary Nurjan Nurlanuly.
Qazirgi tańda Shyǵys Qazaqstan oblysynyń aýmaǵynda tek bir ǵana kompanııa «Qazaqstan turǵyn úı kompanııasy» AQ-men kepildik shart jasasqan. Ol – «VVD-Qurylys» JShS.
Bıyl «Royale Finance Group» JShS, «MRS Company» JShS, «Deıneka» JShS jáne «Elit Stroy Group» JShS úleskerlerden aqsha tartatyny týraly áleýmettik jelige jarnama bergen. Bul zańsyz áreketteri úshin olardyń isi Óskemen qalasynyń ákimshilik quqyq buzýshylyq isteri jónindegi mamandandyrylǵan sotyna jiberildi.
Sot qaýlysymen olar QR ÁQBtK 320-baby 1-bóligimen kináli dep tanylyp, 300 AEK mólsherinde aıyppul tóleýge mindetteldi.
