ShQO-da Ýaq Barmaq batyrdyń beıitine qulpytas ornatylady
ASTANA. QazAqparat - Shyǵys Qazaqstan oblysynyń Kókpekti aýdanynda Ýaq Barmaq batyrdy urpaq jadynda jańǵyrtý maqsatynda aýqymdy shara ótedi. Shara aıasynda batyrdyń basyna qulpytas ornatylmaq, dep habarlaıdy «QazAqparat» HAA tilshisi.
Kókpekti aýdanyndaǵy jergilikti «Juldyz» jáne «Novaıa jızn» gazetiniń dırektory Darhan Berdibektiń habarlaýynsha, batyr babany eske alý sharasy Kókpekti aýdanynda 16-17 qyrkúıek kúnderi uıymdastyrylady. Buqaralyq is-sharalar legi «Bolashaqqa baǵdar: Rýhanı jańǵyrý» baǵdarlamasy aıasynda Barmaq batyr beıitiniń basyna qulpytas ornatýmen bastalady.
«Eki kúnge sozylatyn sharalar aıasynda aýdan ortalyǵyna tarıhı tulǵanyń keýdemúsini ornatylyp, alaman báıge ótedi, as beriledi.
«Ýaq Barmaq batyr - taǵylym jáne rýhanı jańǵyrý» atty ǵylymı konferentsııa jumysyna elimizge tanymal tarıhshylar men shejireshiler qatysady», - dep habarlady Darhan Berdibek.
Barmaq batyr - HÚІІІ ǵasyrda jońǵar basqynshylaryna qarsy janqııarlyqpen kúresken sansyz qazaq batyrlarynyń aldyńǵy qataryndaǵy ýaqtyń Erenshi rýynan shyqqan arýaqty er, dańqty qolbasshy. 1723-1758 jyly Edil-Jaıyqqa batystan shabýyldaǵan qalmaq shapqynshylyǵyna, Mańǵystaýdy basyp alǵan túrikpenderge, shyǵystan basa kóktep qazaq jerine ishkerileı engen jońǵar basqynshylaryna qarsy kúresterde Kishi júz jasaǵyna Balta, Bógenbaı batyrlarmen birge qolbasshylyq etken tulǵa.
Tarbaǵataı óńirin jońǵarlardan qaıtyp alǵan 80 kúnge sozylǵan «Shorǵa» shaıqastary kezderinde, osy urystardyń kýási bolǵan naıman Káribaı aqynnyń jyrynda Barmaq «Ýáli áýlıe, kóripkel sharapatty da batyr» dep sýretteledi.
