ShQO-da túz taǵylaryn qutyrýǵa qarsy vaktsınalaý jumystary júrgizilip jatyr

ÓSKEMEN. KAZINFORM — Shyǵys Qazaqstan oblysynda jabaıy janýarlar eldi mekenderde jıi kirip kete berýine baılanysty qutyrý aýrýynyń aldyn alý sharalary kúsheıtildi.

Máselen, jýyrda Óskemen qalasynyń irgesinde jabaıy túlki turǵyndardyń kózine túsken. Al bul adamdarǵa ǵana emes, malǵa da qaýip tóndiredi.

ShQO veterınarııa basqarmasynyń basshysy Ramıl Saǵandyqovtyń aıtýynsha, oblys aýdandarynda jyrtqysh ańdardyń tabıǵı mekendeý ortasynda aýqymdy profılaktıkalyq jumystar júrgizilgen.

— Biz túlkiler men qasqyrlar mekendeıtin aýmaqtarǵa shamamen 15 myń doza bolıýstyq vaktsına tarattyq. Aldyn alý sharalary Tarbaǵataı, Glýbokoe jáne Altaı aýdandaryn qamtydy, — deıdi ol.

Mamandar bolıýstyq vaktsınanyń jabaıy janýarlarǵa arnaıy jem retinde taratylatynyn atap ótti. Bul ádis adammen tikeleı baılanyssyz ımmýnıtet qalyptastyrýǵa múmkindik beredi.
Profılaktıkalyq sharalardy kúsheıtýge ótken jyly iri qara mal arasynda tirkelgen qutyrý deregi sebep bolyp otyr. Oshaq Tarbaǵataı aýdanyndaǵy Aqjar aýyldyq okrýginde anyqtalǵan. Aýrý sıyr men ıtten tabylǵan.

Veterınarııalyq qyzmettiń málimetinshe, juqtyrý sebebi — túlkiniń tistep alýy.

— Bul jalǵyz jaǵdaı bolǵanymen, vırýstyń úı janýarlary men malǵa da qaýip tóndirýi múmkin ekenin kórsetti, — deıdi Ramıl Saǵandyqov.

Dıagnoz rastalǵannan keıin mamandar barlyq termınaldyq-profılaktıkalyq jáne karantındik sharany júrgizip, ınfektsııanyń ary qaraı taralýyna jol bermedi.

Eske salsaq, osyǵan deıin Óskemen irgesine túlki kirip ketkeni habarlanǵan.