ShQO-da turmystyq zorlyqqa tap bolǵan 84 áıelge ýaqytsha baspana berildi
ÓSKEMEN. QazAqparat – Shyǵys Qazaqstan oblysynda «Otbasyndaǵy zorlyq-zombylyqqa jol joq» aktsııasy bastaldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, óńirde otbasyndaǵy zorlyq-zombylyqtyń aldyn-alý maqsatynda 13-15 qarasha aralyǵynda respýblıkalyq aktsııa ótkizilýde.
«Jyl basynan beri ShQO áıelderdi zorlyq-zombylyqtan qorǵaý bólimshesiniń ınspektorlary ýaqytsha baspana berý úshin 84 áıeldi daǵdarys bólimshelerine jiberdi, al 1854 áıel daǵdarys ortalyǵynyń psıhologtarynan keńes aldy. El aýmaǵynda karantındik shekteýlerdiń engizilýine baılanysty úkimettik emes uıymdardyń ókilderimen birge turmystyq zorlyq-zombylyqqa ushyraǵan adamdarmen onlaın rejımde kezdesýler ótkizilýde», - dep habarlady vedomstvo ókilderi.
Aktsııa otbasyndaǵy turmystyq zorlyq-zombylyqtyń aldyn alý, ana men balany qorǵaý, qoǵamdaǵy otbasynyń rólin nyǵaıtýǵa baǵyttalǵan. Óńirdiń polıtsııa qyzmetkerleri turǵyndarǵa 77-46-76 senim telefony arqyly turaqty túrde túsindirý jumystaryn júrgizýde. Otbasylyq-turmystyq qatynastar salasyndaǵy máselelerdi túsindirý jáne aqysyz keńes berý maqsatynda jedel jeli (77-19-22, 8-771-44-511-44) iske qosyldy. Sonymen qatar, otbasy tynyshtyǵyn jıi buzatyn adamdar men berekesiz otbasylarǵa turǵylyqty jeri boıynsha tekserý júrgiziledi.
