ShQO-da turmystyq tehnıka tasymaldap kele jatqan júk kóligi órtendi
ÓSKEMEN. QazAqparat – Shyǵys Qazaqstan oblysynda turmystyq tehnıka tasyp kele jatqan júk kóligi órtendi, dep habarlaıdy QazAqparat.
ShQO Tótenshe jaǵdaılar departamenti baspasóz qyzmetiniń málimetine súıensek, 19 jeltoqsanda saǵat 13.00-de «Óskemen-Almaty» tasjolynyń 23-shaqyrymynda «Gazel» avtokóligin jalyn sharpyǵan.
«Qozǵaltqyshtyń janǵysh bólikteri, aldyńǵy eki dóńgelektiń tysy jáne kóliktiń júksalǵyshyndaǵy kir jýǵysh mashınalar órtendi. Tilsiz jaýdyń jalpy aýmaǵy 8 sharshy metrdi quraǵan», - dep habarlady vedomstvo ókilderi.
Oqıǵa ornyna kelip jetken órt sóndirýshiler qyzyl jalyndy aýyzdyqtady. Aldyn ala málimet boıynsha órttiń shyǵýyna – qaýiptiligi joǵary agregatpen abaısyz jumys atqarý sebep bolýy múmkin.
