ShQO-da turmystyq qatty qaldyqtar úshin eki polıgon salynbaq
ÓSKEMEN. QazAqparat – Shyǵys Qazaqstan oblysynda turmystyq qatty qaldyqtar úshin eki polıgon salynady, dep habarlaıdy QazAqparat tilshisi.
ShQO Energetıka jáne turǵyn úı-kommýnaldyq sharýashylyǵy basqarmasynyń bólim basshysy Samat Súleımenov qoqystyń kóp jınalýy ótkir máselelerdiń biri ekenin atap ótti. Sonyń saldarynan qorshaǵan ortaǵa zalal kelýde. Ekologııanyń buzylýyna ruqsat etilmegen qoqys tastaıtyn alańdar da áser etip otyr. Turǵyndar qoqys polıgondarynyń qala ishinde de, odan tys jerlerde de paıda bolatyndyǵyna kún saıyn kýá. Osy rette, basqarma mamandary qalalar men aýdandar ákimdikterimen birlesip, jaǵdaıdy tolyǵymen óz baqylaýyna alǵan. Búgingi kúni oblysta Memleket basshysynyń turmystyq qatty qaldyqtar polıgondaryna qatysty tapsyrmalaryn oryndaý boıynsha is-sharalar jospary bekitildi.
«Búgingi kúni oblystyń qalalary men aýdandary ákimdikterine turmystyq qatty qaldyqtar polıgondaryn salý boıynsha JSQ ázirleýge arnalǵan shyǵyndardy 2021 jyldyń bıýdjetine qosýdy, sondaı-aq qoldanystaǵy polıgondardy sanıtarlyq jáne ekologııalyq normalarǵa sáıkes keltirý qajettigi týraly aıtyldy. Barlyq usynystar men eskertýler nazarǵa alynady», - dedi Samat Súleımenov.
Sondaı-aq, Eýropa qaıta qurý jáne damý bankimen yntymaqtastyq aıasynda 2021 jyly Óskemen jáne Semeı qalalarynda jańa sanıtarlyq polıgondar men qoqys óńdeý keshenderin salý josparlanýda.
«Bul barlyq belgilengen normalarǵa sáıkes keletin eki jańa polıgon bolmaq. Óskemende qazir jer ýchaskesin resimdeý jumystary júrgizilýde. Jeltoqsan aıynyń sońyna deıin barlyq jer aktileri alynady. Búginde Halyqqa qyzmet kórsetý ortalyǵyna ótinim berildi. Al Semeı qalasy boıynsha jer telimi belgilengen», - dedi bólim basshysy.
