ShQO-da túrmege tyıym salynǵan zatty kirgizbek bolǵandardyń 16 ret joly kesildi
ÓSKEMEN. QazAqparat – Shyǵys Qazaqstan oblysynda túrme aýmaǵyna tyıym salynǵan zatty kirgizbek bolǵandardyń 16 ret joly kesildi, dep habarlaıdy QazAqparat tilshisi.
ShQO boıynsha QAJD baspasóz qyzmetiniń málimetine súıensek, er adam 8 lıtrge jýyq alkogoldi kolonııaǵa jasyryn laqtyrmaq bolǵan. Qaýipsizdigi joǵary túzetý mekemesiniń qyzmetkerleri ony kolonııa aýmaǵynda ustady. Ol ishimdikti 5 plastıkalyq bótelkege quıyp alǵan.
«Tún kezinde túzetý mekemesiniń mańynda kele jatqan er adam skotchpen myqtap oralǵan plastıkalyq bótelkelerdi temir tordan asyryp laqtyrmaq boldy. Saraptama qorytyndysy boıynsha bótelkelerdegi suıyqtyqtyń spırt ekeni anyqtaldy. Kúdikti «sálemdemeniń» sottalǵandarǵa arnalǵanyn moıyndady», - dedi OV 156/2 mekemesiniń bastyǵy Erkin Qabın.
Qazirgi ýaqytta 34 jastaǵy Almaty oblysynyń turǵynyna qatysty QR ÁQBtK-niń 481-babyna (qylmystyq-atqarý júıesi mekemelerinde ustalatyn adamdarǵa tyıym salynǵan zattardy berý) sáıkes ákimshilik is qozǵalǵan.
Aıta keteıik, jyl basynan beri 156/2 mekemesi aýmaǵyna tyıym salynǵan zatty kirgizbek bolǵandardyń 16 ret joly kesildi.
